الاتحاد الكاثوليكي العالمي للصحافة- لبنان اوسيب – لبنان
فكرة خلق العالم بعدا لليوم بتحيّر العقل البشري
كيف هالدني انرسمت كيف الشمس موجودة و القمر و الكواكب و الحياة كلها
افكار و نظريات بتناقض بعضها
ان كان هالأرض هيي بس عليها الحياة
ان كان عمرها ألوف السنين
ان كان الإنسان مميز و مخلوق هون ما بيشبهو حدا بالخليقة كلها
كنت انت النور
قبل ما حتى تشوف هالدني النور
كنت انت الحياة
قبل ما حتى هالدني تعرف الحياة
كنت انت الكلمة
قبل ما حتى نعرف شو بتعني الكلمة
كنت انت البشرية
قبل ما حتى من رحم محبتك تخلق البشرية
كنت انت البتولية
قبل ما حتى نفهم معنى هالكلمة
كنت انت السلام
قبل ما نعرف شو بيعني السلام
كنت انت العيلة
قبل ما حتى تخلق و تكون انسان ليعمل عيلة متلك و يكون عصورتك
قبل كل شي انت موجود
قبل كل فكرة انت حاضر
قبل كل نفس انت مصدر النفس
و بلحظة تفجرت محبتك بدني ما كان فيا شي
لصار كل شي فيا بترجم قداستك
خلقت كل شي و بالآخر قبل ما ترتاح
قدمت للحياة حياة بتشبهك
انسان و سلطت هالأنسان ع كل شي
صرت اله بي
صار الإنسان ابنك
وهون من الأول بلشت قصة كل بي و ابنو
عصي اوامرك… هرب منك
خان العهد بينو و بينك
نكرك و عبد آلهة اخترعا
قتل باسمك اخترع حروب
نكرك و صلبك
تاجر فيك ضيعك و رجع
و من هون بتكمل القصة
راح و رجع ولاقاك ناطرو
غلط و تاب و لاقاك غامرو
اكتشف رحمتك و تكمش فيك
كنت انت معلق قيه و ماشي معو
وهوي مش منتبهلك
ليش ؟ لأنك بيّ
بيّ بحب و بيرحم
بيّ بسامح و بيبقى امين لوعدو
بيّ بيعرف الأنسب لولادو بس عاطين الحرية لهني يقررو
بيّ آمن بولادو
حتى قبل ما هني يعرفو شو بيعني الإيمان
بيّ وثق بولادو
حتى قبل ما هني يعرفو شو بتعني الثقة
هيدا انت يا بيي البسما
و متل انت بيي عالأرض
بيشبهك كتير
بحب بسامح بيخدم بيصغي
رحوم و جبار
بشكرك يا بيي ع كل شي خلقتو فيي و كرمالي
لو ما عرفت قيمة هالحياة بعرف انك معي و رح تعلمني لأفهم و لما اتلاقى فيك اتأملك و اعرف هالنعمة الكبيرة نعمة اني كمان انا بيّ بشبهك
بعطي الحياة متلك و بحب متلك
لجرب افهمك بدي حياة ابدية لأنو حياتي عالأرض بتكفي بس لأصغي لصوتك و عيش حسب رغبة قلبك هالقلب المليان رحمة و سلام
و لما يخلصو دقات قلبي بعرف اني رح ارجع عيش بقلبك … بقلب الحب
بشكرك يا بيي اللي بالسما
أليتيا
